Egyptians Good Readers discussion

يا الف اهلا بيك نورت الجروب ..
وان شاء الله تكون من انشط القراء واكثرهم تفاعلا ويبقي ليك بصمة وتفيد كل القراء ..

اكيد دلوقتي انت محتار شوية .. او مش فاهم الموقع او الجروب .. او مستغرب .. او جيت صدفة .. ايا كان اللي انت حاسس بيه اقعد خد واجبك الاول وشم نفسك وارتاح ورحرح .. ههههههه


ودلوقتي نخش في الجد
اكيد قريت قوانين الجروب .. وفكرته ..

احنا هنا في خدمتك .. الموضوع دا ليك بقا .. اسال براحتك عن اي شئ او اي حاجه عايز تعرفها وكل القراء معاك وهيجاوبوك ..






## وبالمرة بقا فضفض شوية وقولنا ..
عرفنا بنفسك واحكيلنا عنك شوية .. وعن علاقتك بالقراءة
قولنا جيت هنا ازاي؟؟ وعرفتنا منين ؟؟
بتحب القراية قد ايه ؟ ولا لسه ناوي تحبها ؟؟
ناوي تشارك وتتفاعل ولا تنام في الخط وتزعلنا منك ؟؟

واهلا بيك مرة تانية :)

اهلا بيكو انا عرفت الجروب عن طريق جودريدز وبحب القراءة جدا جدا واتمنى اشارك معاكو بس الحقيقة انا لسة جديد على اب جودريدز وبصراحة موش عارفة المشاركة والتفاعل ف الجروبات فيه بتكون ازاي

مساؤ تلخير هرفمى تكتر عاى تلجروب

Shaimaa wrote: "اهلا بيكو انا عرفت الجروب عن طريق جودريدز وبحب القراءة جدا جدا واتمنى اشارك معاكو بس الحقيقة انا لسة جديد على اب جودريدز وبصراحة موش عارفة المشاركة والتفاعل ف الجروبات فيه بتكون ازاي"

اهلا بيكي يا شيماء نورتي الجروب ..
وان شاء الله تكوني من اهم وانشط القراء ومالية الجروب تفاعل ..

في الصفحة الرئيسية لينا هتلاقي مقدمة عن الجروب والقوانين وكدا ..
وهتلاقي الموضوعات متقسمة لفولدرات ..
يعني مثلا لو عندك استفسار .. يبقي موضوعك يتحط في فولدر استفسارات اقتراحات القراء ...

لو هترشحي كتب او هتسالي عن كتب في مجال معين .. يبقي موضوعك يتحط في فولدر .. ترشيحات الكتب .... وهكذا


تبقي تعملي موضوع ازاي اصلا؟؟
فوق جدول المواضيع وقصاد كلمة
Discussion Board
هتلاقي كلمة
new
اضغطي عليها واكتبي موضوعك . واختاري الفولدر اللي تتحط فيه من البوكس اللي بعد عنوان الموضوع ..


----
وقبل دا طبعا خدي لفة في الجروب اتفرجي ع الموضوعات والمناقشات الموجودة فيه .. الموضوع يشبه للمنتديات لو بتشاركي فيها ..


=====
غير الموضوعات هتلاقي فيديوهات وصور وبيكون فيه مسابقة ادبية للموهوبين بس دي كل فترة .. ومناقشات للكتب ... وتقدري انتي بنفسك تفتحي مناقشات في مواضيع بتفهمي فيها او عايزة تعرفي اكتر عنها وكدا ..

وتقدري تشاركينا باي خواطر ليكي عن القراية او اي نشاطات مشتركة للجودريدز في فولدر مجتمع الجود ريدز

او تزودي معلومات وتنمي مهارتك اكتر في القراية . لما تقري المواضيع اللي في فولدر .. فن القراءة ..

=========
شكلي توهتك زيادة ههههههه اهلا بيكي في الجروب

تمام شكرا جزيلا هاخد لفة وهحاول افهم الدنيا ماشية ازاي واكيد هحب ارشح كتب وافتح مواضيع للمناقشة واقدم ريفيوهات للكتب .. سعيدة بوجودي معاكو

اهلا بيكوا انا عرفت الجروب عن طريق اصدقاء ليا ع الجود ريدز موجودين فيه :)
و مش فاهمه النظلم خالص و مش كنت عارفه اتعامل معاه ,, بس حضرتك جاوبت تقريبا ع كل اسئلتي في ردك علي شيماء
و هاخد لفة بردوا و لو في حاجة هقولها لحضرتك :)

ازيكم ... عاملين ايه ... ان شاء الله نكونوا بخير ... انا بحب القراءة جدا و مش بعرف انام الا لما اقرأ....اول كتاب قرائته كان لعنة الفراعنة و كان عمري 9 سنين ... فتح عيني على عالم انا كنت اجهله تماما و عشقت من يومها القراءة و الفراعنة .... اما عن الجروب كنت بدور على reading groups ناس بتحب القرتءة و نتناقش على اي كتاب .... اعرف اراء الناس و انتقادتهم و الكتب ال عجبتهم بس .... و بس كده

Nourhan wrote: "اهلا بيكوا انا عرفت الجروب عن طريق اصدقاء ليا ع الجود ريدز موجودين فيه :)
و مش فاهمه النظلم خالص و مش كنت عارفه اتعامل معاه ,, بس حضرتك جاوبت تقريبا ع كل اسئلتي في ردك علي شيماء
و هاخد لفة بردوا ..."

يا الف اهلا بيكي يا نورهان .. نورتي الجروب .
خدي لفتك وهستني تعقيبك بعد ما تخلصي

Noor wrote: "ازيكم ... عاملين ايه ... ان شاء الله نكونوا بخير ... انا بحب القراءة جدا و مش بعرف انام الا لما اقرأ....اول كتاب قرائته كان لعنة الفراعنة و كان عمري 9 سنين ... فتح عيني على عالم انا كنت اجهله تماما..."

اهلا بيكي يا نور نورتي الجروب ..
وان شاء الله تلاقي كل اللي تتمنيه واكتر معانا .. :)

اهلا بيك واضح ان الجروب كويس جدا وانت مهتم بالأعضاء الجديدة تمام. انا بحب القراءة جدا خاصة الروايات. وعايزة اقرأ في كل حاجة للمعرفة للمعرفة وأطلاع. عرفت الجروب من الجودريدز كنت بشوف الجروبس الي موجودة والجروب دة عجبني وبس :) واهلا بيك مرة تانية :)

أنا حبيت القراية من الكتب اللي عند مامتي في المكتبة قريت حاجات مترجمة لشكسبير وتاييس وبعدين قريت رجل المستحيل وملف المستقبل وحاجات د. نبيل . القراية تقريبا أهم حاجة في حياتي ممكن أستغنى عن أي حاجة إلا هي. عرفت الجروب من goodreads :)

اهلا بيكوا ,, من زمان بتمنى اكون ف وسط ناس بتحب القراءة ونتنقاش ف الكتب لان اغلب صحابى فاشلين ههههه .. اتعرفت عالجروب ازاى مش فاكر بصراحة ,, بحب القراءة من امتى ,, من ساعة ما اتولدت وبدأت اقرأ وبابا الله يرحمه عودنى عالقراية لحد ما بقيت دودة قراية زى ما بيقولوا والحمد لله ,, اتمنى اشارك واكون عضو نشط معاكم وخفيف عليكم

بالمناسبة اسمى أحمد 22 سنة ,, بتاع اجتماع

Ahmed wrote: "
يا الف اهلا بيك نورت الجروب ..
وان شاء الله تكون من انشط القراء واكثرهم تفاعلا ويبقي ليك بصمة وتفيد كل القراء ..

اكيد دلوقتي انت محتار شوية .. او مش فاهم الموقع او الجروب .. او مستغرب .. او جيت..."

يا أهلا وسهلا وألف شكر للترحيب
أنا انضميت للموقع أخيرا وانضميت للجروب فور دخولي للموقع عشان اتناقش مع الأصدقاء المصريين في الكتب العربيه والأجنبيه اللي باقرأها.
سعيده جدا بالجروب وبإذن الله أشارك معاكم كتير وبرضه حاخد لفه زي ماقالت الجميلات اللي ردوا قبلي.

عمروو..تانية صيدلة..الكلية مش مساعدة اووي ع القراية..بس بحاوول بررده..مليش ف جوو الكتب الثقافية الكبيرة دا :D بس بحب الفكرة الحلوة..بديت بالفيل الازرق ومكملين اهوو :D

تحياتى للاستاذ احمد ادمن الجروب وكل الاعضاء المحترمين ...دى اول مشاركه ليا عموما فى اى منتدى او جروب دفعنى ليها عشقى للكتب وايمانى بان محبى القرأة عموما اوسع عقلا وارحب صدرا الامر اللى يخلى التواصل بينهم اضافة ثريه لنفس كل واحد...علاقتى بالكتاب بدأت ببصمه وراثيه نصفها تحمل جينات ام صيدلانيه قارئه من طراز فريد تحتفظ باقل قصاصة ورق فيها اى معلومه مهمه والنصف الاخر جينات اب استاذ قانون باحث من الطراز الاول باللغه الفرنسيه قبل العربيه التركيبه دى اثمرت عن نفسيه مهووسه بالاطلاع والمعرفه افتكر انى وفرت من مصروفى مبلغ اتنين جنيه ونص فابتدائى
-الكلام ده فبداية التمانينات كان مبلغ كبير محدش يستغرب _ عشان اشترى عدسه مكبره لان فيها لمبه صغيره تساعدنى انى اقرا لما يطفوا النور عشان انام بدرى لميعاد المدرسه وكبرت وسافر والدى ونحن معه للسعوديه للعمل بشركة فرنسيه وهناك اتأثرت بثقافتين على النقيض التام ثقافة المجتمع السعودى المغلق جدا على افكاره بايجابياته وسلبياته وثقافة المجتمع الفرنسى حيث معسكر الفرنسيين وناديهم الخاص المنفتح لاقصى درجاته بايجابياته وسلبياته ولكم ان تتخيلوا حجم ذلك التأثير لمحب المعرفه والقرأه اهمها كان الانفتاح فعليا على اى رأى مغاير ومخالف حتى وان بدا شديد التطرف او شديد الاباحه وهو امر ان لم يلهمك الله الهدايه سهل الانجراف لايهما اعتقد انى طولت فالحديث عن نفسى اوى اعتذر منكم

مش جديدة ف جود ريدز بس جديدة ف الجروب :)
انا بحب القراءة اوى عندى استعداد اقرا اى حاجة ف الدنيا
^____________^
مش عارف اقول اي تانى بس مبسوطة انى معاكووو :)

انا جديدة ف جود ريدز و ف الجروب بقالى يمكن شهر او اقل .. القراء بالنسبة ليا العالم اللى مش بروحه فى الحقيقة بتودينى دنيا تانية عالم انا اللى بتخيله و بخلى زى ما انا عاوزة ... حاجة بتريحنى نفسيا و بتفرحنى ,,, عرفت الجروب من البحث فى الموقع و عجبتنى المواضيع و بشارك كل ما الاقى موضوع عجبنى ^_^

Rody wrote: "اهلا بيك واضح ان الجروب كويس جدا وانت مهتم بالأعضاء الجديدة تمام. انا بحب القراءة جدا خاصة الروايات. وعايزة اقرأ في كل حاجة للمعرفة للمعرفة وأطلاع. عرفت الجروب من الجودريدز كنت بشوف الجروبس الي موج..."

نورتي الجروب يا رودي .. وواضح انك ان شاء الله هتبقي من انشط الاعضاء وهنشوفلك مواضيع ومشاركات قريب ..

لفي في الجروب كدا .. واي وقت تحبي ترجعي للموضوع هنا وتسالي عن اي حاجه نورينا

Yasmin wrote: "أنا حبيت القراية من الكتب اللي عند مامتي في المكتبة قريت حاجات مترجمة لشكسبير وتاييس وبعدين قريت رجل المستحيل وملف المستقبل وحاجات د. نبيل . القراية تقريبا أهم حاجة في حياتي ممكن أستغنى عن أي حاجة ..."

نورتينا يا ياسمين .. وكنا حابين ترغي شوية اكتر عشان الرغي من اهم مهارات لاي عضو فعال هههههه

في انتظار تفاعلك ونشاطك في الجروب

Ahmed wrote: "اهلا بيكوا ,, من زمان بتمنى اكون ف وسط ناس بتحب القراءة ونتنقاش ف الكتب لان اغلب صحابى فاشلين ههههه .. اتعرفت عالجروب ازاى مش فاكر بصراحة ,, بحب القراءة من امتى ,, من ساعة ما اتولدت وبدأت اقرأ وباب..."

اهلا بيك يا ابوحميد .. نورت الجروب
وانت بتاع اجتماع بقا .. يعني مفروض يبقي ليك بصمة كبيرة ف الجروب مش هوصيك ..
في انتظار نشاطك ومتابعتك وتفاعلك في الجروب .. نورتنا

هدى wrote: "Ahmed wrote: "
يا الف اهلا بيك نورت الجروب ..
وان شاء الله تكون من انشط القراء واكثرهم تفاعلا ويبقي ليك بصمة وتفيد كل القراء ..

اكيد دلوقتي انت محتار شوية .. او مش فاهم الموقع او الجروب .. او مس..."


يا الف اهلا يا هدي نورتينا ..
خدي لفة مع الزميلات وتعالوا تاني مع بعض نكمل رغي هنا
عشان تكملي او بمعني اصح تبدأي تكلمينا شوية عنك وعن القراية ..

نورتينا

Amr wrote: "عمروو..تانية صيدلة..الكلية مش مساعدة اووي ع القراية..بس بحاوول بررده..مليش ف جوو الكتب الثقافية الكبيرة دا :D بس بحب الفكرة الحلوة..بديت بالفيل الازرق ومكملين اهوو :D"

اهلا بيك يا عمرو .. نورت الجروب
عايز اقولك انت مجاهد يابني عشان بتقرا وانت في صيدلة ... وبداية موفقة ولسه الجاي احسن ان شاء الله

خلينا نشوفك .. متغبش

Adel wrote: "تحياتى للاستاذ احمد ادمن الجروب وكل الاعضاء المحترمين ...دى اول مشاركه ليا عموما فى اى منتدى او جروب دفعنى ليها عشقى للكتب وايمانى بان محبى القرأة عموما اوسع عقلا وارحب صدرا الامر اللى يخلى التواصل..."

اهلا بيك يا عادل .. نورت الجروب وزدته شرف
عايز اقولك اني استمتعت بقراية البوست بتاعك .. وواثق انك كمان هتكون اثراء للجروب وللقراء ان شاء الله وتفيد اكتر ما هتستفيد .. وتحياتي ليك ولاسرتك الكريمة اللي زرعت فيك حب القراءة ..

نورتنا :)

Reham wrote: "مش جديدة ف جود ريدز بس جديدة ف الجروب :)
انا بحب القراءة اوى عندى استعداد اقرا اى حاجة ف الدنيا
^____________^
مش عارف اقول اي تانى بس مبسوطة انى معاكووو :)"

اهلا يا ريهام .. نورتي الجروب

ايه الرغي دا يا بنتي بقالي نص ساعه بقرأ في البوست بتاعك ...

رجاء خدي لفة وتعالي تاني عرفي الناس بيكي .. ولو مش عارفه تقولي ايه ردي ع الاسئلة اللي انا كاتبها في اول الموضوع ... اتعلموا الرغي يا جدعان هههههههه

نورتي :)

Rawan wrote: "انا جديدة ف جود ريدز و ف الجروب بقالى يمكن شهر او اقل .. القراء بالنسبة ليا العالم اللى مش بروحه فى الحقيقة بتودينى دنيا تانية عالم انا اللى بتخيله و بخلى زى ما انا عاوزة ... حاجة بتريحنى نفسيا و ب..."

اهلا روان نورتينا وايد وايد وايد
احنا بنشكر البحث اللي دلك علينا :) ونتمني ان شاء الله تدلي كل اصحابك ع الجروب عشان عددنا يزيد اكتر واكتر ونفيد بعض كلنا ..

وخلينا نشوفك في الجروب ونشوف نشاطك كدا

Ahmed wrote: "Reham wrote: "مش جديدة ف جود ريدز بس جديدة ف الجروب :)
انا بحب القراءة اوى عندى استعداد اقرا اى حاجة ف الدنيا
^____________^
مش عارف اقول اي تانى بس مبسوطة انى معاكووو :)"

اهلا يا ريهام .. نورت..."

هههههههههههههههه الله يكرمك نورك :D

اسمى ريهام محجوب ف كلية الألسن غاوية دراسة لغات و انفتاح ع ثقافات اخرى و بميل جدا لشرق اسيا

لو جيت اتكلم عن القراءة بقى انا بحب اقرا ف كل حاجة ف الدنيا بس يمكن اكتر الموضوعات اللى بحبها أصول الاديان و علم الجريمة وعامة متضحكوش هو فعلا علم قائم بذاته و اسمه علم الجريمة :D

موضوع بقرا من امتى ده ف صعب احدد بالظبط لانى بقرا من زمان من وانا ف ابتدائى و كنت غاوية اوى كتب فلك عن المجرات و حركة الكواكب و الجو ده :D

لما طلعت اعدادى بقى اتجهت للادب العالمى وقريت لشكسبير و جول فيرن والناس اللطيفة دى :D

ف ثانوى بقى كنت بميل للشعر اكتر و اتجهت للشعر المعاصر بالتحديد
وبالتأكيد كان بيتخلل الفترات دى كتب وروايات من كل
الانواع
الكاتب المفضل بالنسبالى هو أنيس منصور بحس فعلا ان كتاباته بتلمسنى او انه بيصيغ افكارى بس بطريقة ادبية

و ف الشعر طبعا العبقرى نزار قبانى يليه فاروق جويدة

اللى ناقصنى ف الوقت الحالى انى اركز اكتر ع الادب العالمى لانى اهملته ف السنوات الاخيرة و اكتفيت بالادب العربى

علاوة ع حبى للقراءة انا غاوية كتابة .... شعر و مقال

و ممممممممممممممممم اعتقد كده انى رغيت اوووى :D

تحياتى ^__________^

انا عرفت الجروب عن طريق جودريدز ولسه مبتديء في عملية القراءة وان شاء الله لا اتركها
الصراحة انا لسه مش فاهم الموقع اوى ولا طريقة التفاعل فيه بس انا بحاول وربنا يسهل

Reham wrote: "Ahmed wrote: "Reham wrote: "مش جديدة ف جود ريدز بس جديدة ف الجروب :)
انا بحب القراءة اوى عندى استعداد اقرا اى حاجة ف الدنيا
^____________^
مش عارف اقول اي تانى بس مبسوطة انى معاكووو :)"

اهلا يا..."


بسم الله ماشاء الله .. تقدم هايل .. اهو كدا انا اطمنت علي مستقبلك في الرغي هههههه خضتينا عليكي في اول طلعة ليكي في الجروب ..

حلو اوي تنوع المجالات اللي قريتي فيها .. وحلو انك بتقري في علم الجريمة (انا درسته بحكم تخصصي) واكيد لما ترجعي تقري في الادب العالمي هترجعي تحسي الفرق بين الفرجة علي ماتشات الدوري الاسباني وماتشات الاهلي والزمالك هههههه

بالنسبة للشعر والكتابة .. جيتي متاخرة شوية عن المسابقة الادبية اللي عملناها .. وان شاء الله تكوني من الفايزين في المسابقة الجاية ..

وفيه فكرة تانية بندرس تنفيذها اننا نخصص الموقع بتاع المسابقة الادبية اللي فات او موقع جديد لكل ابداعاتكم ويكون دائم لنشر اعمالكم ان شاء الله..

نورتينا يا ريهام

Mohamed wrote: "انا عرفت الجروب عن طريق جودريدز ولسه مبتديء في عملية القراءة وان شاء الله لا اتركها
الصراحة انا لسه مش فاهم الموقع اوى ولا طريقة التفاعل فيه بس انا بحاول وربنا يسهل"

نورتنا يا محمد .. وان شاء الله تكون من انشط القراء ..
اي حاجه تحب تعرفها اسال واحنا معاك

احم احم..اسمي الاء زكريا واولي طب بيطري و18سنة وبس. تقريبا مختلفش كتير عن الاعضاء الجدد بحب القراءة بردو بس المشكلة ف الوقت واختلافي مع اختي ف انواع الكتب هي بتحب الروايات وانا اخر نوع افراة بيكون روايات بحب الشعر الكلاسيكي الفصيح والكتب العلمية والدينية يعني بحب اقرا الكتاب واطلع بأستفادات وبردو كتب الحقائق_ مليش ف الفانتازيا اوي ولا الرعب اصل اية الجو دة هنسرح ببعض هههه بس لحاد دلوقتي انا مش فعالة ف الجروبات معرفش اعمل اية_ يعني انا حاطة اسمي فجروبات كتير بتنطط من هنا لهنا بس ممكن توجهوني يعني واتمني اكون عنصر فعال بس صدقا انتو جروب زي الفل

lolo wrote: "احم احم..اسمي الاء زكريا واولي طب بيطري و18سنة وبس. تقريبا مختلفش كتير عن الاعضاء الجدد بحب القراءة بردو بس المشكلة ف الوقت واختلافي مع اختي ف انواع الكتب هي بتحب الروايات وانا اخر نوع افراة بيكون ..."

نورتي الجروب يا الاء .. وان شاء الله تكوني من انشط العناصر واكثرها فعالية :) اهي دعوة في التلت الاخير بقا وربنا يستجيب هههههههه

بالنسبة للقراءة .. عايز اقولك ان ممكن نختلف مع اللي بيقرأ روايات وبس ومبيقراش غيرها .. لانه مجرد قارئ للمتعة مش اكتر .. بس محدش يقدر ينكر ان حتي الروايات قرايتها مفيدة .. وبتطلعي منها بافكار ومعلومات .. ودا طبعا بيختلف من رواية للتانية ..

فيه روايات بتديكي معلومات تارخيه مثلا مغلفة باحداث .. او حتي علمية .. او افكار حياتيه واجتماعية ... والحد الادني انك بتشوفي تجارب بشر وتعيشي واقع ناس كتير غيرك مش هتعيشه ... وبتتعلمي منها .. وارجع واقول دا برضو بيختلف من رواية للتانية ..

الخلاصة .. ان ميزة الرواية واللي بيخليها مفيدة.. انها مبتديش اي معلومة بشكل مباشر .. ودا بيخلي المعلومة تثبت عندك من غير حتي ما تقصدي ..

اخيرا ... جربي تقري روايات من وقت للتاني خصوصا المشهور والمعروف منها واقري ترشيحات الاصدقاء هنا ... وهتفهمي قصدي .. وسيبك طبعا من الروايات بتاع اليومين دول اللي كلها ايحاءات عشان متتعقديش من اولها .. .

=========
خدي لفة في الجروب الاول .. وشوفي انواع الموضوعات اللي فيه .. وبعدين تعالي وهنوجهك ونقولك تعملي ايه ونجاوب علي كل اسئلتك ..

نورتي :)

دة نورك حقيقي حقيقي ..واللة يعني عندك حق بس مشكلتي ف الرواية ع نقيض القصة القصيرة تماما الوقت واكيد في استفادة فى كلاهم بس الرواية قطاع طولي عكس القصة قطاع عرضي وبدون وصف وشرح ممل لان اعتقد كدة كدة الخيال موجود بس عندك حق هي بتختلف من رواية لاخري انا لسة مخلصة رواية يعني انا متيمة بيهاااا جداا مش عارفة ينفع اكتب اسمها ولا اية انت عارف انا مستجدة بس ما علينا انت فكرتني انا لسة هكتب الريفيو اهو بس مش اي نوع ف الروايات وانا بكرة اجيب كتاب ويطلع وحش ههههههه مش بخل واللة بس اهو كدة بقا

انا وليد وسعيد جدا بوجودى معاكم والحقيقة عرفت الجروب لانى بحب اكتشف الجديد دايما فلكا شوفته وانا باتصفح فى الجود ريدز قلت ادخل اشوف ايه فكرته ودلوقتى هاخد لفة سريعه وبعد كده هانتكلم كتير

سلامو عليكم .. لسا جديد .. و عندس شغف لنوع القراءة التاريخية ..
ايه الكتب الي ممكن تفيدني و تكون حجات موثوقة و مش مملة

lolo wrote: "دة نورك حقيقي حقيقي ..واللة يعني عندك حق بس مشكلتي ف الرواية ع نقيض القصة القصيرة تماما الوقت واكيد في استفادة فى كلاهم بس الرواية قطاع طولي عكس القصة قطاع عرضي وبدون وصف وشرح ممل لان اعتقد كدة كدة..."

تسلمي ..
لا اكتبي اسمها طبعا , دي مش دعاية واحنا مش برنامج . دا بيتك :)
واهو الجود ريدز وجروبنا بقا فرصة ان شاء الله عشان متجبيش كتاب وحش ابدا .. اقري الريفيوهات واراء اللي سبوقي .. واكيد د امش بخل ... شكلك من الناس اللي بتحس ان الكتب ليها روح .. ولو مش هتقدر تحافظ عليه بانها تقراه هتركنه ويموت ... يبقي ليه تشيل ذنبه !! متجيبوش احسن

:D

Waleed wrote: "انا وليد وسعيد جدا بوجودى معاكم والحقيقة عرفت الجروب لانى بحب اكتشف الجديد دايما فلكا شوفته وانا باتصفح فى الجود ريدز قلت ادخل اشوف ايه فكرته ودلوقتى هاخد لفة سريعه وبعد كده هانتكلم كتير"

اهلا بيك يا وليد نورت الجروب :)
مش هعطلك هسيبك تاخد لفة براحتك وتنورنا تاني :)

MohamedElfateh wrote: "سلامو عليكم .. لسا جديد .. و عندس شغف لنوع القراءة التاريخية ..
ايه الكتب الي ممكن تفيدني و تكون حجات موثوقة و مش مملة"

اهلا بيك محمد .. نورت الجروب
الكتب التاريخية فعلا من امتع القراءات ..
وتقدر تفتح موضوع في فولدر ترشيحات الكتب وتسأل فيه عن الكتب التاريخية وكل الاعضاء هيساعدوك ..

ومؤقتا .. تقدر تشوف اللينك دا
https://www.goodreads.com/topic/show/...

انا عرفت الجروب من جودريدز ^_^
من و انا صغيره و انا بقرأ كتير جدا و بفضل قاعده بالكتب حتي اني قرأت سلسله هراي بوتر كلها و انا ف اولي اعدادي و من و انا في ابتدائي بشتري قصص و حاجات كده بس دلوقتي الموضوع تطور ل روايات و كتب و بقيت اهتم بالشعر بالذات و بحب كل انواع الكتب .. انا كنت فاكره ان حالتي طبيعيه لحد ما ماما كانت بتقول ل واحد قريبنا جي من السفر ابتهال دودة كتب بتحب القراءة جدا !! :D
والله ما كنت واخده بالي بس احلي حاجه في الحياة الكتب معرفش من غيرها هنعيش ازاي .. اكتر وقت بحب اقرأ فيه قبل ما انام ^_^
و شكرا ع الجروب الجميل ده :)♥

Ebtehal wrote: "انا عرفت الجروب من جودريدز ^_^
من و انا صغيره و انا بقرأ كتير جدا و بفضل قاعده بالكتب حتي اني قرأت سلسله هراي بوتر كلها و انا ف اولي اعدادي و من و انا في ابتدائي بشتري قصص و حاجات كده بس دلوقتي الم..."

اهلا بيكي يا ابتهال .. نورتي بيتك ومكانك ع النت .. واللي مليان ديدان قراية كتير زيك وبيشاركوكي نفس الشغف والحب للقراءة ..

ان شاء الله تواجدك معانا يكون مثمر ومفيد ليكي ولينا ... وتكوني من انشط الاعضاء ..

نورتينا :)

ممكن اعرف طريقة مناقشه الكتب علي الجروب بتكون ازاي ؟

Nourhan wrote: "ممكن اعرف طريقة مناقشه الكتب علي الجروب بتكون ازاي ؟"

فيه مناقشات مفتوحة لو انتي حابة تفتحي مناقشة في موضوع او كتاب مثلا وتكلمينا عنه ..

او مناقشات الجروب .
ودي بنفتح موضوع وبناخد اقتراحاتكم وبيتعمل بيها تصويت لمدة 5 ايام .. بعدها بندي فرصة لقراءة الكتاب وبعدين يتفتح موضوع المناقشة ..

تمام بيبقي المناقشه بين الاعضاء عبارة عن review الكتاب و لا بتبقي منفضلة في comments ؟

Nourhan wrote: "تمام بيبقي المناقشه بين الاعضاء عبارة عن review الكتاب و لا بتبقي منفضلة في comments ؟"

لا بتبقي
comments

لان الريفيوهات بتبقي في صفحة الكتاب نفسها في الجودريدز .. وهنا نقاش لمحتواه اعمق

تمام :)

اممممممم انا بحب القراءة وخصوصا الكتب العلمية والروايات والشعر انضميت للجروب من فترة لكن بصراحة ما اظهرتش اي نشاط :D لكن ان شاء الله هتابع معاكوا الفترة اللي جاية واكيد هستفيد برضو

Walaa wrote: "اممممممم انا بحب القراءة وخصوصا الكتب العلمية والروايات والشعر انضميت للجروب من فترة لكن بصراحة ما اظهرتش اي نشاط :D لكن ان شاء الله هتابع معاكوا الفترة اللي جاية واكيد هستفيد برضو"

نورتينا يا ولاء .. ومعلش برضو لو جت متأخرة ..
مستنين ان شاء الله نشوف نشاطك وبصمتك في كل اركان الجروب وكل مواضعيه ان شاء الله ..

ان شاء الله :)

الحقيقة انى دخلت الجروب ده عن طريق الموقع وأعجبتنى فكرة الجروب , بالنسبة للقراءة فأنا أعشقها ولكننى لست متعمقا فى بحرها المحيط بل أنا أبحر بالقريب من الشاطئ , بالتأكيد أنوى التفاعل ولكن العذر بسبب دراستى والإمتحانات :) بالتوفيق لكل من فى الجروب

ahmed wrote: "الحقيقة انى دخلت الجروب ده عن طريق الموقع وأعجبتنى فكرة الجروب , بالنسبة للقراءة فأنا أعشقها ولكننى لست متعمقا فى بحرها المحيط بل أنا أبحر بالقريب من الشاطئ , بالتأكيد أنوى التفاعل ولكن العذر بسبب ..."

اهلا بيك يا احمد . نورتنا وان شاء الله تكون من كبار بحارة القراءة .. وربنا يوفقك في دراستك وامتحاناتك .. :)

لما ترجع بقا لف لفة في الجروب عشان لو عندك اي اسئلة . وعرفنا عليك اكتر

السلام عليكم ورحمة الله وبركاته
بدايتى مع القراءة بدأت من زمن غير بعيد ..قترات تتجلي واخري تنسلخ من حبي ومواظبتى واخري من اهمالي للقراءة
:
:
:
خلاص نبدأ بقي :
عرفت الموقع من واحدة صاحبتى ..موقع رائع حقا ..اتمنى يبقي فيه فعاليات كتير ونفيد بعض بقدر استطاعتنا ...
ويكون فيه كمان مناقشات وترشيحات لكتب فكرية بعيدة عن الابتذال ..
ممكن فعلا نغير حياتنا مع بعض
اشتركت فى جروبات كتير بس الاول حماس وبعد كده خمول بشع
يا ريت نستمر على الحماس للاخر
:::
تحياتى
كل التوفيق