الخيانة Quotes

“_ ثقة _
لما تكون خلاص علي حافة الجبل
أرجوك ماتخافش
وخليك واثق في المفاجآت
يإما هيظهر حد ينقذك في آخر لحظة
يإما هتكتشف .. إنك بتعرف تطير”
― عمر طاهر, الخيانة: مشوار محرج لحد الحزن

“حبل غسيل
3
حاولت قبل كده تتخلص من اسرارك
في اول صندوق زباله-انساني جدا
وفي شنطة قماش شديدة القماش
شديدة السواد بفتحات تهوية
كفاية لفضحك
وبدون ما تاخد بالك ترميها من ورا دهرك
وتسمع صراخ اللي جرحتهم
ومعركتهم الفاشلة مع شعورك بالذنب
صدقني ..هتضحك من ورا قلبك
ويدهشك تسقيف الجمهور وانت ماشي
علي ايقاع يأسك
وبتدخل دايرة المجهول”
― عمر طاهر, الخيانة: مشوار محرج لحد الحزن

“_ حبات السكر _
حبات السكر ..
اللي وقعت منها وهيا بتحلي كوباية الشاي
كان لازم أخبيها في جيبي
حبات السكر..
كانت الشئ الوحيد اللي ممكن يعوضني ..
عن مرارة السنين اللي عدت علينا ..
وإحنا قاعدين نحاسب بعض .”
― عمر طاهر, الخيانة: مشوار محرج لحد الحزن

“شرف المحاولة
ماحاولتش مرة تسأل
نفسك ف ايه؟
أو تسيب روحك فتلقاها علي شط البحر
في عز طوبه واقفه..ايدها في جيوبها
أو صوابعها في عيون الموج
أو بتحاول تضرب آخر سيجاة في الكون
كل القضايا خسرانة
وشرف المحاولة زي عود الكبريت
وانت لسه مصمم
تقابل نفس اللي راحو
وفي نفس المواعيد القديمة
بنفس الزهق اللي بيسطير علي لعبة
الخير والشر جواك”
― عمر طاهر, الخيانة: مشوار محرج لحد الحزن

“_ الشتا _
واحشني باقولها واستني
لا ورد يرد أو حنة
ياطير سارح علي كيفه
لا نار طايل ولا جنة .”
― عمر طاهر, الخيانة: مشوار محرج لحد الحزن

“_ دماغ _
كل مرة اغمض فيها عينيا
بتهب المزيكا في وشي
وباتفاجئ إن قلبي لسه شغال
وبافضل فاكر آخر حاجة شفتها .... لمجرد ثواني .”
― عمر طاهر, الخيانة: مشوار محرج لحد الحزن

“حبل غسيل
4
برغبة شريرة في السعادة الابدية
وحاجة ملحة لجرح حقيقي
ودهشة مناسبة للون بشرتك
وبثقة أقل
بتواجه ثقة الزمن الكاملة
تجاه سر سعادتك الزايفة”
― عمر طاهر, الخيانة: مشوار محرج لحد الحزن