1- صوّر الكتب الجديدة اللي بتلاقيها في سكتك، وطبعا لازم تكون الكتب دي حديث السوشيال ميديا عشان تبان مواكب للأحداث، مش لازم تقراها بس لازم تصورها كتير، وانستجرام بقى بصورك وانت بتقرأ ومش واخد بالك.

2- اتكلم كتير عن إن الكتب خاربة بيتك ومضيع فلوسك عليها، مش لازم تشتريها بس لازم تقول كده.
3- شيّر اقتباسات واعمل قلوب فوقها، ولازم تحط هاشتاج في آخر كل جملة، حاجات زي‫#‏في_عشق_القراءة‬ 
heart emoticon 4- عارف محل النمرسي بتاع الترتر؟ أو الشيف شربيني وهو بيحط متزاريلا على أي أكل؟ اعمل زيّه مع التشكيل.. امسك حبة كده في إيدك ورشّهم على الكلام، مش مهم يكون تشكيل الحروف والكلمات مظبوط، بس اكتب بتشكيل أي كلام، فانت مثلا ممكن تكتب "القَرْعٌ لًمَا اسّتُوِى قُالِ للخًيارْ يًا لٌوبِيًا".. التشكيل بيدي هيبة كده ويحسس اللي قدامك إن الكلام مهم.
5- لما تلاقي حد معجب بكتاب انت متعرفوش، قوله لالالالا مش حلو خالص، ولما يسألك عن رأيك فيه، قوله "لا تعليق" ولازم تقولها بجد كده كأنك قرفان.
6- بقية النقطة السابقة، لما تلاقي حد بيقرأ رواية، اضحك، ولما يسألك بتقرأ إيه حاليًا، عرفه انك بتقرأ كتاب معقد جدًا عن "الراديكالية الاستراتيجية والمؤامرة الصهيونية في لفّ ورق العنب"، ولما يسألك يعني ايه، بص له باستخفاف كده مع ضحكة خفيفة وخد تنهيدة كده (ولازم يكون فيها هوا) وقوله "لما تكبر هقولك".
7- لو في واحد عنده فولورز كتير وبيكتب أي قلش، وجات سيرته قدامك، قول "ده صديقي"، اوعى تقول "صاحبي"، المثقف مبيقولش "صاحبي"، لازم "صديقي"، ومثلا لو هو اسمه محمد أحمد لازم تضيف انت، وتقول "على فكرة اسمه الحقيقي محمد سيد أحمد" واتكّ على السين، واتكلم عن آخر بوستات كتبها وقد إيه كانت عبقرية وانه كتبها وانتوا سوا "بتتصعلكوا في شوارع القاهرة الكئيبة".
8- اكتب بوستات طويلة، مش مهم جايبها منين، مش مهم بتقول إيه، ممكن تدخل أي منتدى وتجيب أي حوار وتاخده كوبي وتحطه على صفحتك، ولازم في آخر البوست تكتب هاشتاج باسمك عشان الأشرار ميسرقوش تعبك وكتابتك.
9- ستبهرك
10- جمع أي هري هريته طول حياتك واعمل كتاب في معرض الكتاب، مش كتاب في أي وقت، لأ لازم يكون في المعرض، وقول لأصحابك اللي عندهم صفحات كبيرة يشيروا ويكتبوا عن أعظم كتاب جه البشرية، واعمل حسابات مزيفة وادخل اشكر في نفسك، وبعد يومين بالظبط من صدور الكتاب، ادخل اشكر جمهورك على بيع الطبعة العشرين واكتب انك متردد تجهز الـ 21، وسيبهم يتحايلوا عليك شوية.