بسمع كتير كتاب أو مبدعين في أي مجال عموماً بيقولوا إن من أسباب نجاحهم أو غزارة انتاجهم إنهم بيركزوا مع نفسهم بس ومبيهتموش بحضور ندوات أو فعاليات وقافلين على نفسهم
والحقيقة أنا بالنسبة لي الكلام ده مختلف معايا تماماً
أنا بشوف إن حضور الندوات والفعاليات والمناقشات ده بينشط المخ وبيخلي الواحد يفكر في حاجات كتير كان ممكن متجيش ع باله لو فضل قاعد لوحده في قوقعته وانه يتعرف ع تجارب واتجاهات جديدة في مجاله حتى لو متوافقتش معاه بس ممكن تنور لمبة في دماغه بأي شكل
محدش فينا مهما حاول هيقدر يقرأ كل الكتب الموجودة في البشرية ولا يتفرج على كل الأفلام اللي انتجت ولا يشوف كل المسرحيات وهو قاعد في بيته
عن نفسي حضور الندوات والفعاليات دي عرفتني بكتب وأفلام واتجاهات فنية وفلسفية مكنتش هلحق أعرفها لو فضلت متقوقعة على نفسي في بيتي، ومهما حطيت خطط إني هبقى أقرأ الكتاب الفلاني أو أشوف الفيلم العلاني، هتفضل الخطط دي بتتأجل لصالح حاجات تانية هشوف إنها طارئة وأهم في الوقت ده
ده غير إن نزولي وحضوري الفعاليات دي حتى لو قاعدة في الركن البعيد الهادي على الوضع الصامت وبتأمل المناقشة من بعيد، وده اللي عادة بيحصل يعني، فأحياناً بتنور معايا وتخليني أكتب نص جديد من وحي الأجواء، حتى لو الكلام اللي حواليا كله هري في هري أصلاً ومالوش لازمة، لكن ممكن كلمة تتقال في وسط الكلام تعمل تداعي لأفكاري وذكرياتي أنا حواليها ويطلع منها نص ليا، وكل ده أكيد مكنش هيحصل لو فضلت قاعدة في البيت وشي للحيط
وده بيخليني أقابل تجارب حية فعلاً من الحياة واتعرف على خبرات وشخصيات جديدة مش بس هتفيدني في الكتابة لكن هتفيدني في الحياة ككل
ويمكن أنا بحس بقيمة ده أكتر نظراً لإن أنا شغلي كله أون لاين فمبنزلش ولا بقابل ناس ولا بعيش تجارب مختلفة في إطار الحياة المهنية؛ فلو فضلت كمان قاعدة في البيت أدبياً مبحضرش أي حاجة؛ فأنا كدة حرفياً مش هيبقى عندي أي سبب يخليني أخرج من البيت وهفضل حابسة نفسي فيه لحد ما أصدي على كل المستويات يعني
لكن يمكن الكلام ده يكون نافع للمبدعين اللي عندهم وظايف تانية بتاكل نص يومهم وبيختلطوا فيها بالناس وبيقابلوا من خلالها تجارب جديدة وبيشوفوا منها الحياة، ساعتها مش هيبقوا فعلاً محتاجين يحضروا ايفنتات وفعاليات ثقافية إلا بقدر ما قد يكون مفيد ليهم، وهيبقوا محتاجين الوقت ده أكتر في انهم يتفرغوا لإبداعهم الشخصي

#صفحات_من_حياتي
#سارة_الليثي