سارة الليثي's Blog: عيش الحياة

حلم أي كاتب أن يصل بما يكتبه إلى العالمية، ولا يتم ذلك إلا من خلال عملية الترجمة؛ فترجمة العمل الأدبي إلى لغات مختلفة تمنحه جمهوراً أوسع تسهل عليه قراءة العمل بلغته الأم، كما تتيح للكاتب تقديم عمله للجوائز والمسابقات العالمية في مجال الأدب والتي لا تقبل سوى الأعمال المترجمة.
وفي عالمنا العربي حقق العديد من الكتاب الروائيين هذه المعادلة، فترجمت أعمالهم إلى لغات مختلفة وأصبح لهم جمهور من القراء الأجانب في مختلف دول العالم ووصلت أعمالهم إلى لجان مسابقات الأدب المتنوعة وفازوا بالعديد من الجوائز، وفي هذا المقال سنلقي الضوء على بعض من أفضل الروايات العربية المترجمة عالمياً؛ فتابعوا معنا.
#ثلاثية_نجيب_محفوظ:
تتربع أعمال أديب نوبل العربي الوحيد #نجيب_محفوظ على قائمة أفضل الروايات العربية المترجمة عالمياً، فقد ترجمت كافة أعماله تقريباً خاصة بعد حصوله على جائزة نوبل في الأدب، حيث وقعت الجامعة الأمريكية في القاهرة معه عقداً بترجمة كافة أعماله إلى الإنجليزية، وقد حظيت بالإقبال الكبير من جمهور قراء اللغة الإنجليزية؛ حتى إن عائدات مبيعات أعماله المترجمة إلى الإنجليزية تفوق مبيعات النسخ الأصلية من أعماله باللغة العربية.
وقد كانت ثلاثية نجيب محفوظ أحد الأعمال التي أشير إليها في أسباب حصوله على جائزة نوبل في الأدب مما جعل الإقبال عليها متزايداً، فلم تترجم فقط إلى الإنجليزية بل ترجمت للعديد من لغات العالم المختلفة، وكانت قد ترجمت أول الأمر إلى الفرنسية في ثمانينيات القرن الماضي قبل حصوله على جائزة نوبل.
وثلاثية نجيب محفوظ هي رواية أجيال على ثلاثة أجزاء: بين القصرين- قصر الشوق- السكرية، تتبع خلالها عائلة السيد أحمد عبد الجواد وأبنائه وترصد التغيرات السياسية والثقافية والاجتماعية التي طرأت على مصر خلال تلك الفترة من خلال تلك العائلة مما يجعلها رواية تأريخ لمصر الحديثة، وقد احتفى بها النقاد أيما احتفاء عقب صدورها.
وقد تم تحويل ثلاثية نجيب محفوظ لأعمال سينمائية من بطولة يحيى شاهين وآمال زايد ونخبة من كبار فناني مصر في الستينيات، وفي الثمانينيات تم انتاج ثلاثية نجيب محفوظ مرة أخرى كمسلسلات تلفزيونية من بطولة محمود مرسي وهدى سلطان.
رواية #موسم_الهجرة_إلى_الشمال:
يعتبر #الطيب_صالح مؤلف رواية موسم الهجرة إلى الشمال من أهم الروائيين السودانيين على الإطلاق، وتعد كتاباته أعمال فارقة في تاريخ الأدب السوداني، وقد تم اعتبار روايته موسم الهجرة إلى الشمال من بين أفضل عشرة روايات عربية مما جعلها بالتبعية من أفضل الروايات العربية المترجمة عالمياً.
وقد ترجمت رواية موسم الهجرة إلى الشمال لأكثر من ثلاثين لغة من بينها الإنجليزية والألمانية والروسية، وتدور الرواية حول شخصية مصطفى سعيد الذي يعيش في إحدى قرى السودان، ولا يعرف أحد عن ماضيه شيئاً حتى وفاته، حيث يوصي برعاية ولديه وبيته إلى الراوي الذي يكتشف حقيقة شخصيته من خلال مكتبته وما تحويه من كتب ومذكرات.
يكتشف الراوي أن مصطفى سعيد ذاك حاصل على الدكتوراه من جامعات بريطانيا، وقام بتدريس علوم الاقتصاد بها، وكان مشهوراً بمغامراته النسائية هناك، حيث كانت تعتريه الرغبة بغزو الإنجليز جنسياً كما غزوا السودان فكرياً واستعمارياً، وتوضح رواية موسم الهجرة إلى الشمال الاغتراب الذي يعتري بعض العرب عند احتكاكهم بالغرب.
رواية #العسكري_الأسود:
يعد #يوسف_إدريس رائد القصة القصيرة في مصر، ولكن ذلك لم يمنعه من تقديم إسهاماته الأدبية المختلفة في مجالات النقد والمسرح والرواية، والتي كان من بينها رواية العسكري الأسود التي تعد من أفضل الروايات العربية المترجمة عالمياً، فترجمها إلى الإنجليزية الأديب الأمريكي روجر آلان، وترجمها إلى اليابانية المستعرب الياباني نوبواكي نوتوهارا بالإضافة إلى ترجمتها إلى لغات أخرى.
وتوثق رواية العسكري الأسود التعذيب داخل السجون السياسية المصرية في فترة الأربعينيات من القرن الماضي، وذلك من خلال شخصية الدكتور شوقي الذي خرج من السجن شخصاً مختلفاً عنه قبل أن يدخله، يعيش على مسرح الحياة بلا روح، حتى تواتيه الفرصة في لقاء العسكري الأسود الذي أذاقه مر التعذيب داخل السجن بعد أن دارت الدائرة عليه وهده المرض حتى أصابه بالجنون.
#رواية_الأرض:
رواية الأرض هي أهم وأول أعمال الكاتب الكبير #عبد_الرحمن_الشرقاوي الذي أمضى حياته محاولاً التوفيق بين الفكر الاشتراكي والإسلامي وإبراز ملامحه في التاريخ الإسلامي، ومن أشهر أعماله في هذا الصدد مسرحيتيه عن الإمام الحسين بن علي: الحسين ثائراً والحسين شهيداً.
وتعتبر روايته "الأرض" من أشهر الروايات التي صورت معاناة الفلاح المصري في عهد الملكية وارتباط الفلاح بأرضه، فتدور أحداث رواية الأرض في قرية مصرية يكافح فلاحيها في الحفاظ على أرضهم من استيلاء الإقطاعيين وفرض الضرائب الباهظة عليهم، وقد ترجمت رواية الأرض إلى لغات عديدة.
حظيت رواية الأرض بالإقبال من جمهور القراء في اللغات التي ترجمت إليها مما جعلها في قائمة أفضل الروايات العربية المترجمة عالمياً، وقد انتجت رواية الأرض كفيلم سينمائي في سبعينيات القرن الماضي من إخراج المخرج العالمي يوسف شاهين وبطولة عمالقة السينما المصرية: محمود المليجي ويحيى شاهين وتوفيق الدقن وحمدي أحمد، ورشح الفيلم لجائزة السعفة الذهبية في مهرجان كان السينمائي.
#رواية_ذات:
يعد #صنع_الله_إبراهيم من أهم الروائيين العرب والمصريين على قيد الحياة، وتتميز أعماله على الدوام بتشابكها مع الأحداث السياسية في مصر والوطن العربي، ولديه قدرة عالية على السرد والحكي بأسلوب مشوق يجذب القارئ من أول صفحة في العمل وحتى آخر صفحة، مما شجع على ترجمة أعماله.
وترجع أهمية رواية ذات للروائي صنع الله إبراهيم لكونها توثق تاريخ مصر الحديثة سياسياً واجتماعياً واقتصادياً منذ ثورة يوليو لعام 1952م وحتى تسعينيات القرن الماضي، وذلك من خلال مراحل حياة بنت اسمها ذات، وقد اعتمد الكاتب صنع الله إبراهيم على أسلوب جديد في كتابة روايته ذات، حيث طعمها بأقصوصات من الصحف والمجلات تتداخل مع أحداث الرواية.
وتمت ترجمة رواية ذات إلى الإنجليزية على يد جوزيف كالدربانك مساعد مدير المجلس الثقافي البريطاني، وحازت على إقبال من جمهور قراء الإنجليزية مما جعلها في قائمة أفضل الروايات العربية المترجمة عالمياً، وتم إنتاج رواية ذات كمسلسل تليفزيوني لموسم رمضان 2013م من بطولة نيللي كريم وإخراج كاملة أبو ذكرى التي أدخلت بعض التعديلات على النص الأصلي؛ ليغطي المسلسل الفترة التاريخية حتى اندلاع ثورة يناير 2011م.

#أفضل_الروايات_العربية_المترجمة_عالمياً
#جولة_في_الكتب #روايات
#مقالات #سارة_الليثي

من خمس سنين تقريباً كان عندي أكونت على تطبيق أبجد عادي كنت بنزل عليه ريفيوهات للكتب اللي بقرأها، وبضيف أي كتب قريتها ومش موجودة على الموقع زي ما بعمل على الجودريدز
وفي يوم من الأيام وصلتني رسالة من مؤسسة التطبيق إيمان حيلوز إننا نعمل فيديو ميتنج على اعتبار إني من الأشخاص النشطين على الموقع
وخلال الميتنج ده قالت لي إنهم بيجددوا التطبيق ومش هيكون عليه غير الكتب المتوافرة فعلاً للقراءة إلكترونيا على التطبيق ومش هيكون متاح إضافة كتب من القراء والمستخدمين يعني وإنهم بيدووني إشتراك مجاني لشهرين كهدية يعني
وكان ميتنج جميل الحقيقة وبعدها طلبوا مني إني أشتغل معاهم لفترة كفريلانسر في تصنيف الكتب على التطبيق، حاجة زي أمينة المكتبة كدة في المكتبات العامة :D
وصراحة ده كان من أمتع الشغل اللي عملته في حياتي وكمان براتب كان حلو أوي في وقتها
وخلال الفترة دي أنا صنفت تقريباً ألف ونص كتاب في مكتبة التطبيق في فئات مختلفة واتعرفت على كتب مكنتش أعرفها قبل كدة
واتمنيت إن في يوم من الأيام هيكون ليا كتب ع التطبيق ده إن شاء الله
ودلوقتي أمنيتي اتحققت فعلاً الحمد لله وكتابي #الإمام_محمد_عبده_مجدد_العصر بقى موجود على تطبيق أبجد ومتاح للقراءة إلكترونياً للقراء على التطبيق، على اللينك ده:
https://tinyurl.com/23ae82ag
وده أمر يسعدني جداً الحقيقة وهيسعدني أكتر إني أشوف تعليقات وآراء القراء على الكتاب في التطبيق ^_^

#صفحات_من_حياتي
#إنجازاتي
#سارة_الليثي

زمااااااااااااااان (مش زمان أوي يعني) 😏
أول ما اتخرجت كنت بفكر في مشروع مع Sarah Adly إننا نعمل مكتب تنظيم أفراح في أسيوط
وبدأنا فعلاً في التخطيط للمشروع وعملنا صفحة ع الفيسبوك وابتدينا ننزل عليها حاجات ونحاول نعلن عن الموضوع ع أمل إن لما يجيلنا زباين ونقدر نشتغل معاهم وناخد فلوس بعد كدة نقدر نأجر مكان
ووقتها كنت مخطوبة لواحد كان زميلي في الكلية أكبر مني بدفعتين (أو مقري فاتحتي عشان خالاتي بيقفشوا ويقولوا لي انت اتخطبتي امتى من ورانا)؛ فكنت بفكر إننا بعد كدة نعمل مجلة أفراح تطلع من المكتب ده ونطبق فيها شغل الإعلام والصحافة اللي اتعلمناه في الكلية وتبقى مجلة متخصصة يعني
بس بعد كدة الموضوع اتفشكل (موضوع الارتباط) وأنا قعدت مكتئبة ومنقطعة عن العالم سنتين (علماً إن العلاقة كلها شاكب راكب كانت عشر شهور يعني وهو خطب واحدة تانية بعدها بسبع شهور 😏)
وطبعاً موضوع تنظيم الأفراح ده اتنسى واتحط من ضمن حاجات كتير حلمت بيها في وقت من الأوقات ومتحققش منها حاجة
ولفت سنين كتير ودارت (أه هم كتير الحقيقة مش هكدب يعني 😒)
وبقيت بشتغل مشاريع كتابة محتوى مع مواقع مختلفة بكتب لهم أي نوعية مقالات يطلبوها
ومن شهرين كان فيه مشروع كتابة مقالات باللهجة المصرية لموقع مجلة أفراح لسة بادية EG.Wedding - ايجي ويدنج وقدمت فيه وتم اختياري
الحقيقة أنا مكنش في دماغي أي حاجة من اللي فاتت دي ولا كنت واخدة بالي أصلاً كان بالنسبة لي مجرد مشروع شغل بقدم عليه وخلاص
لكن في وسط ما أنا بشتغل لاقيت نفسي افتكرت كل الكلام ده، واستغربت إن إزاي السنين لفت كدة واللي حلمت بيه زمان قدرت أحقق ولو جزء منه بعد ما كنت نسيته أصلاً ومبقاش يجي في بالي
ودي مش أول مرة تحصل معايا الحقيقية، حاجات كتير كنت عايزاها في فترة من الفترات، وكنت طول ما أنا بفكر فيها وعايزة أعملها فعلاً مكنتش بتحصل، لكن أول ما أنساها ألاقيها جت لوحدها
ومن المفترض إن ده اللي بينص عليه قانون الجذب، إننا نتخيل الحاجة وإننا حققناها وننساها ومنفضلش متمسكين بقكرة احتياجنا لتحقيقها دلوقتي ويالا حالاً
وفي كتاب #السماح_بالرحيل لـ #ديفيد_ر_هاوكينز كان في مقولة كتبتها ع ورقة وعلقتها قدامي ع الحيطة بتقول:
التخلي عن الرغبة لا يعني أن لا تحصل على ما تريد ولكنها تمهد الطريق لحدوثه
لكن على الرغم من كدة إلا إن في الحقيقة بيفضل دايماً سؤال ملح يرن جوايا، إن بالنسبة لحاجات كتير إيه فايدة إنها تحصل بعد ما أكون فقدت نفس الشغف اللي كان موجود عندي وقت ما اتمنيتها؟ أي نعم في أوقات كتير كان بيرجع لي جزء من الشغف ده بالتدريج، بس الفكرة إن في لحظة حدوث الشيء ده مبيبقاش فيه الفرحة اللي تخليك تنط من مكانك مثلاً، بتبقى شايف إن أه تمام عادي أو جايز متاخدش بالك أصلاً في الأول وتتعامل معاها ع إنها حاجة يومية عادية ملهاش أهمية خاصة زي ما حصل معايا كدة
في الكتب اللي بتتكلم عن قانون الجذب بيقولوا إن ده أمر صحي، وإن مش صح نتعامل مع الحاجة من طاقة احتياج وإنما من طاقة اكتفاء، وفي الأمثال الشعبية القديمة كانوا بيقولوا: الدنيا مبتديش محتاج
السؤال بقى اللي بيؤرقني هنا: يعني أنا هلاقي الحب وقت ما أبقى مش عايزاه؟ طب هعمل بيه ايه ساعتها وأنا مش عايزاه؟ وما جايز ده يخليني أرفضه أصلاً وقتها ومهتمش بوجوده وأضيعه من غير ما أخد بالي! 🙄
ما علينا من الفلسفات الفارغة اللي بهلك فيها مخي دي
المهم أنا سعيدة بالتجربة اللي خضتها خلال الفترة اللي فاتت، وأتمنى إن كل حاجة اتمنيتها في يوم من الأيام ترجع تحصل معايا دلوقتي تاني، وأتمنى إن السنة دي تكون هي سنة تحقيق الأحلام قبل ما تخلص فعلاً <3

#إنجازاتي
#صفحات_من_حياتي
#سارة_الليثي

بسمع كتير كتاب أو مبدعين في أي مجال عموماً بيقولوا إن من أسباب نجاحهم أو غزارة انتاجهم إنهم بيركزوا مع نفسهم بس ومبيهتموش بحضور ندوات أو فعاليات وقافلين على نفسهم
والحقيقة أنا بالنسبة لي الكلام ده مختلف معايا تماماً
أنا بشوف إن حضور الندوات والفعاليات والمناقشات ده بينشط المخ وبيخلي الواحد يفكر في حاجات كتير كان ممكن متجيش ع باله لو فضل قاعد لوحده في قوقعته وانه يتعرف ع تجارب واتجاهات جديدة في مجاله حتى لو متوافقتش معاه بس ممكن تنور لمبة في دماغه بأي شكل
محدش فينا مهما حاول هيقدر يقرأ كل الكتب الموجودة في البشرية ولا يتفرج على كل الأفلام اللي انتجت ولا يشوف كل المسرحيات وهو قاعد في بيته
عن نفسي حضور الندوات والفعاليات دي عرفتني بكتب وأفلام واتجاهات فنية وفلسفية مكنتش هلحق أعرفها لو فضلت متقوقعة على نفسي في بيتي، ومهما حطيت خطط إني هبقى أقرأ الكتاب الفلاني أو أشوف الفيلم العلاني، هتفضل الخطط دي بتتأجل لصالح حاجات تانية هشوف إنها طارئة وأهم في الوقت ده
ده غير إن نزولي وحضوري الفعاليات دي حتى لو قاعدة في الركن البعيد الهادي على الوضع الصامت وبتأمل المناقشة من بعيد، وده اللي عادة بيحصل يعني، فأحياناً بتنور معايا وتخليني أكتب نص جديد من وحي الأجواء، حتى لو الكلام اللي حواليا كله هري في هري أصلاً ومالوش لازمة، لكن ممكن كلمة تتقال في وسط الكلام تعمل تداعي لأفكاري وذكرياتي أنا حواليها ويطلع منها نص ليا، وكل ده أكيد مكنش هيحصل لو فضلت قاعدة في البيت وشي للحيط
وده بيخليني أقابل تجارب حية فعلاً من الحياة واتعرف على خبرات وشخصيات جديدة مش بس هتفيدني في الكتابة لكن هتفيدني في الحياة ككل
ويمكن أنا بحس بقيمة ده أكتر نظراً لإن أنا شغلي كله أون لاين فمبنزلش ولا بقابل ناس ولا بعيش تجارب مختلفة في إطار الحياة المهنية؛ فلو فضلت كمان قاعدة في البيت أدبياً مبحضرش أي حاجة؛ فأنا كدة حرفياً مش هيبقى عندي أي سبب يخليني أخرج من البيت وهفضل حابسة نفسي فيه لحد ما أصدي على كل المستويات يعني
لكن يمكن الكلام ده يكون نافع للمبدعين اللي عندهم وظايف تانية بتاكل نص يومهم وبيختلطوا فيها بالناس وبيقابلوا من خلالها تجارب جديدة وبيشوفوا منها الحياة، ساعتها مش هيبقوا فعلاً محتاجين يحضروا ايفنتات وفعاليات ثقافية إلا بقدر ما قد يكون مفيد ليهم، وهيبقوا محتاجين الوقت ده أكتر في انهم يتفرغوا لإبداعهم الشخصي

#صفحات_من_حياتي
#سارة_الليثي

الأفلام الألمانية بتتميز بكونها تقضي تلات اربع وقتك وانت بتشوفها مش فاهم في ايه ومين بيودي ع فين والناس دي بتعمل ايه هنا؟
عادة بيناقشوا قضايا نفسية أو سياسية أو مجتمعية بطريقة الترميز بالأشخاص؛ فبيكون في ناس ممثلين في الفيلم هم دورهم محوري رمزياً لكن هم أصلاً مبيجسدوش أدوار بشرية وإنما بيرمزوا لأشياء أخرى
في الفيلم ده خدوا فكرة سائدة كتير بتتقال في الكلام إن المخ عبارة عن غرف كتير، ونفذوها فعلياً وجسدوه على هيئة فندق
الأربع شخصيات اللي كانت في الفندق بتعبر عن أفكار وخناقة البطلة الحقيقة طول الفيلم اللي بتدور في دماغها (وفي دماغ أي حد في الحقيقة برضه وكإن في شخصيات كتير بتتخانق جوانا طول الوقت)
الطفل الصغير هو طفلها الداخلي اللي بيبقى عايز يطلع يلعب ويعبر عن براءته وطفولته طول الوقت
والبت المايعة دي أنوثتها الداخلية اللي عايزة ترتبط ويبقى في راجل في حياتها وتعيش علاقة عاطفية بقى
والرجل بيعبر عن طاقتها الذكورية اللي بتنزل تشتغل وتجيب فلوس
والست الكبيرة هي صوت العقل والإيجو
طول الفيلم هي بتتخانق مع الأصوات دي في دماغها وحاسة إنها مش عارفت تتحكم فيها وإن هم اللي بيتحكموا فيها وبيبوظوا لها حياتها
لكن حياتها مبتتعدلش فعلاً في الآخر غير لما تقبل نفسها بوجودهم جواها وتعرف إن كل حد فيهم ليه وقت محتاج إنه يظهر فيه وإن اللي هيحبها بجد هيحبها بكل تناقضاتها دي وان هي دي ميزتها الخاصة اللي بتفرقها عن أي حد تاني.

#Franky_Five_Star
#أفلام #أفلام_ألمانية
#سارة_الليثي

بينما أسير في طريقي كما اعتدت، اعترضني صبي من الباعة الجائلين يبيع الجوارب القطنية يعرض عليّ بضاعته، كنت أنوي تجاهله كما أعتدت؛ فلا حاجة بي لمزيد من الجوارب، خزانتي ممتلئة بهم، كما إنني لا أرتدي الجوارب القطنية من الأساس، وبعد أن تجاوزته بخطوتين في آخر خطة له لإيقافي دعا قائلاً "يا رب تتجوزي اللي بتحبيه"!
ورغماً عني ارتسمت صورتك في خيالي وابتسمت، لا أدري كيف له أن يختار هذه الدعوة دون غيرها؟ كيف خمن انني غير متزوجة بالأساس وأن قلبي يحلم بك؟ كيف له أن يغامر بشيء كهذا؟
ولكن نجحت مغامرته ووقفت، ولا أعرف من أين تجمع حولي كل هؤلاء الباعة يستغلون وقفتي، وكل منهم يعرض علي بضاعته، ولا أستطيع رده، ولم أدر بنفسي إلا وقد أفرغت جيوبي لهم.
تركتهم ومضيت، بجيب فارغ وابتسامة لا زالت ترتسم على محياي، لم أشعر معها بطول الطريق الذي قطعته سيراً؛ فقد كانت دعوته لا زالت ترن في أذني؛ فلا أسير على الأرض، وإنما عانقت يداي السماء حتى ظننت أنني قد لامست القمر.

#أرجوحة_القمر
#قصص_قصيرة #قصة_قصيرة
#سارة_الليثي

الناس بتحبني طول ما أنا بسمع شكاويهم وبحاول أحل معاهم مشاكلهم وبضحك وأهزر واحسسهم إن الحياة بيس وجميلة يعني وكل حاجة محلولة
وتقريباً في وسط ده كله هم بينسوا إني إنسانة طبيعية والله بتعرض برضه لضغوط وكآبات وأحزان وعادي والله بشعر بالحزن والاحباط وسوداوية الحياة أنا مش شجرة ولا حجرة يعني!
بس بمجرد ما يشوفوا الوش الطبيعي ده بيتاخدوا، اللي هو لا والله احنا مش متعودين عليكي كدة، ده انت اللي بتدينا تفاؤل وطاقة إيجابية وبتنجان
طب أعمل ايه يعني؟ أولع لكم في نفسي عشان تاخدوا الطاقة الإيجابية براحتكم؟!
طب احكي ولا انت مش بتثقي فينا وكدة يعني؟
طب حكيت
ايه النكد ده؟ لا والنبي احنا ما ناقصين احنا عندنا نكد للصبح فكي كدة وبلاش نكد (مع إن لما بيبقوا هم اللي بيحكوا لي نكدهم يعني بيبقى ع قلبهم زي العسل والله ومعندهمش مشكلة خالص انهم بينكدوا عليا يعني)!
طب ما أنا كنت متنيلة ساكتة وقاعدة في حالي ومقلتش لحد تعالى والنبي لما أحكيلك همومي ومشاكلي يعني انتم بتيجوا تقولوا لي احكي عشان تقولوا لي مش عايزين نكد؟ ما تخليكم في حالكم طب وتسيبوني في حالي؟!
لا احنا عايزين الأراجوز اللي بيضحكنا وبيشيل همومنا انت لازم تطلعي المسرح وتأدي دورك ده طول الوقت ومش من حقك تفصلي وتاخدي جنب لنفسك في أي وقت مش جاي ع مزاجنا!
ووأنا بكتب الكلام ده دلوقتي بترن في دماغي أغنية فرقة جزاجا:

كان بلياتشو متخصص..
يموت قدامها تضحكله
وكان عارف بيبني ازاي..
ملامح ضحكة على شكله
ده كان لما يشوف دمعة..
يروح ويشيلها في المونتاج
وكان لو يوم يعوز ضحكة..
يقوم يرسمها بالمكياج
وقف قدامها عالكرسي..
وشد المشنقة بإيديه
فجه واحد و قال وقف..
وضحكوا الناس علي الإفيه
فضل يضحك علي نفسه..
ومش عارف بيضحك ليه
***
دخل بدماغه في الحلقه..
وشدوا الكرسي من تحتيه
وهو لقى إنه بلياتشو..
مقالشي هو نفسه ف إيه
وفي المرة دي تحديدا مجاش واحد..
كما العادة في آخر لحظه قال وقف
وبص ف عينها وقت الموت..
تخيل وقتها شاف إيه
لقاها واقفه بتصقف..
مع الجمهور على الإفيه

#صفحات_من_حياتي
#سارة_الليثي

* والصورة ع المسرح برضه 😏

الشقة اللي احنا قاعدين فيها في القاهرة حالياً اشتريناها من حوالي سنتين تلاتة بس، اشتريناها من ناس مسافرين برة مصر باعوها بالعفش اللي فيها
الأوضة اللي أنا أخدتها كانت بعفشها وفيها دولاب كبير، من ساعة ما قعدت فيها وأنا بستخدم نصه بس ومحتجتش نصه التاني
الفترة اللي فاتت كنت قاعدة زهقانة مش لاقية حاجة أعملها فقلت أدعبس في النص التاني ده شوية أشوف فيه إيه؟
في أحد الأدراج الداخلية الصغيرة جوة الدولاب لاقيت الصور والمذكرات دي، معرفش هل هي خاصة بصاحبة البيت القديمة ولا أمها مثلاً أو حد قريبها نظراً لان التاريخ قديم وسن كاتبة المذكرات كان كبير إلى حد ما وقتها؛ فأعتقد من الصعب انها تكون لسة عايشة لحد دلوقتي
المذكرات تاريخها في السبعينيات وسن صاحبتها كانت في أوائل الخمسينيات وقتها
وعلى الرغم إنها من المفترض ست مش متعلمة أو مكملتش تعليمها بمعنى أصح يعني إلا إن خطها وأسلوبها في الكتابة جميل جداً، ويمكن لو كانت في زمن تاني وظروف تانية كانت بقت كاتبة مثلاً
مذكراتها قطعت قلبي الحقيقة وبكيت معاها كتير، هي معاناة كل واحدة تقريباً من زمنها وقبله وحتى لحد النهاردة على الرغم من اختلاف الظروف والأحوال ظاهرياً إلا إن الألم والمعاناة مازالت واحدة باقية كما هي
قصتها باختصار انها واحدة معشتش يوم في حياتها باختيارها، كان نفسها تكمل تعليمها بس مسمحولهاش بده، أمها ماتت وهي صغيرة فعاشت عشر سنين تخدم أبوها واخواتها، وبدل ما يشكروها ويعوضوها عن ده، أول واحد خبط ع بابهم جوزوهاله من غير حتى ما يسألوها، وبعد جوازها محدش منهم بيهتم بيها ولا بيشوف إيه احتياجاتها وكإنها كانت عبء عليهم ما صدقوا خلصوا منه
من كلامها عن جوزوها واضح إنها بتحترمه وبتقدره لكن في نفس الوقت مش بتحبه، حتى مبتقدرش تتكلم عنه باسمه عادي لازم تحط قبله أستاذ فلان، وعلى الرغم من شكوتها على الورق طول الوقت من تعبها الجسدي والنفسي وآلامها إلا إنها مبتقدرش تشاركه هو أي حاجة من التفاصيل دي، ولا تطلب منه إنها تروح تكشف عند دكتور عظام من كتر تعبها اللي مبينيمهاش الليل، حتى أفكارها عن مستقبل ولادها مش قادرة تشاركها معاه، وحتى احتياجها لهدوم تخرج بيها مش قادرة تطلبها منه لإنها شايفة إن مش من حقها تكون عبء عليه وتطلب على الرغم من إن ده أقل حقوقها الطبيعية يعني المفروض!
ولادها برضه نفس الحال كبروا وكل واحد فيهم شاف حياته بعيد عنها وشايفين إنها مبتفهمش في حاجة فمفيش داعي تتدخل في حياتهم وتعرف تفاصيلهم، لا بيقولوا لها حاجة عن حياتهم المهنية ولا حياتهم العاطفية والزوجية، بس أول ما بيبقى في مصيبة في حياتهم بيجوا يولولولها ويرموا في عبها المصايب ويمشوا، وهي تفضل طول الوقت تهري وتنكت من خوفها عليهم ومش عارفة تعملهم ايه؟
كان نفسها تلف العالم وتشوف كل حاجة فيه لكنها مقدرتش تحقق أي حاجة من ده وبقى أقصى أمنياتها إنها تنزل بس تتمشى ع الكورنيش اللي قدام بيتها من غير ما حد يحاسبها ويفتح لها تحقيق، ومن غير ما جسمها يخونها ويتعب منها في أول خطوتين
والحقيقة أنا مش قادرة أفهم ليه الإنسان -أي إنسان- يكون مكتوب عليه يعيش حياته كلها مسجون جوة نفسه مش قادر يلاقي روح واحدة في العالم الكبير ده تشاركه في روحه ويطمن لها ويرتاح في حضنها؟ ليه يتكتب علينا نعيش العمر كله في وحدة وخوف وألم؟ ليه نتحرم من أي لحظة سعادة وتحقيق أمنيات؟
الست دي في أول صفحة من مذكراتها كانت المفروض الذكرى الخمسين لميلادها، السن ده مش كبير أوي يعني إلا إن هي كان إحساسها طول الوقت إنها خلاص بتموت وبتودع، وإنها هتموت من غير ما تشوف أي سعادة في الدنيا، وحتى ده مبقتش مهتمة بيه وبقى نفسها بس لو تطمن إن ولادها هيكون حظهم أحسن منها وهيقدروا يعملوا اللي هي معملتوش
منكرش إن هي نفسها في أماكن كتير كان تفكيرها تقليدي أوي، ويمكن ده كان عائق كبير بالنسبة لها إنها تقدر تحقق أي حاجة لإن أي نجاح مهما صغر في الحياة محتاج تحدي، بس أنا برضه من واقع خبرتي الضئيلة في الحياة وعلى الرغم من جرأتي وتمردي ع ظروف وأحوال كتير حواليا في الدنيا عشان أخد حقي منها بالعافية، فعارفة برضه إننا مهما حاولنا أحياناً بيكون نصيبنا من الحياة بس هو الفشل والوجع، وإن الأمر في النهاية مش متروك لينا لوحدنا
أتمنى الست دي يكون ربنا عوضها بعد كدة وداقت طعم السعادة اللي عاشت العمر كله محرومة منه، وأتمنى إن مصيري ميكونش زي مصيرها وأعيش العمر ده كله من غير سعادة ومن غير ما أحقق أي حاجة عايزاها، ومن غير ما ألاقي حد يكون لي روح بتكمل روحي 💔

#صفحات_من_حياتي
#سارة_الليثي

وأنا بقلب في شنطة ذكرياتي القديمة لاقيت الجواب ده كنت كاتباه لبابا لما اللي كنت مرتبطة بيه في الكلية جه اتقدم لي وبابا رفضه
وأنا كتبت الجواب ده ع اعتبار إني بتكسف وكدهون يعني فمش هعرف أقول لبابا الكلام اللي أنا عايزة أقوله في وشه، أنا أصلاً كنت مقضياها جوابات وأنا صغيرة، كل ما حد من أبويا وأمي يضايقني ومشاعري تجيب آخرها، اكتب لهم جواب وارميهم لهم وأمشي 😏 ولما بقى فيه ماسنجر بقيت بكتب اللي عايزة أقوله ع الماسنجر، أنا هقعد أهاتي ليه يعني 🙄
المهم بقى لاقيت نفسي كاتبة في الجواب ده إني بحب الشخص ده أوي ومش هعرف أعيش من غيره ومقدرش أتخيل نفسي متجوزة حد غيره ولو متجوزتوش مش هعرف أتجوز حد تاني غيره (أنا قريت ع نفسي باين 😑) وإن لو هيرفضه يبقى يقت*لني أحسن عشان ده كدة موت بالبطيء بالنسبة لي، وبلا بلا بلا كتير كدة قاعدة أقرأه وأنا مذبهلة وفاتحة بوقي ومعدتي بتقلب وعايزة أرجع الحقيقة 🤢 اللي هو مين دي؟ أنا دي؟! الكلام ده أنا اللي كتباه والنبي؟ وايه أفورة المشاعر اللي ملهاش تلاتة لازمة دي أصلاً؟!
المشكلة مش في كدة لا المشكلة ان نفس الكلام ده بالظبط قلته بعد كام سنة ع واحد تاني برضه بغض النظر عن إني قلته لصحابي مش لبابا؛ لإنه متقدمليش أصلاً؛ لإننا مرتبطناش أساساً، وكان إعجاب من طرف واحد أصلاً، بس أنا ماشية أدلدق مشاعر وخلاص، واللي هو مفيش بربع جنيه تعلم من تجاربنا السابقة يعني 😫
ومش عارفة جو الأعياد ده بيقلب معايا بتقليب الذكريات كدة ليه؟! 😯

#صفحات_من_حياتي
#سارة_الليثي

من فترة كنت كل ما تجيلي فرصة شغل أو إنترفيو وألاقي المكان بعيد أو في مجال مش حباه أوي وهيهلك اليوم كله ومش هلاقي وقت لنفسي بعدها ولا لإني أعمل الحاجات اللي بحبها فعلاً، كنت برفض، بس بعد كدة بقعد أنب نفسي إني بضيع فرص وبتاع وإن مش كل حاجة هتيجي زي ما أنا عايزاها، وإني لازم أجبر نفسي أعمل حاجات مبحبهاش ومش عايزاها عشان أوصل للي أنا عايزاه في الآخر، وأشياء من هذا القبيل من اللي الناس كلها بتقولها دي
أكتشفت بقى مؤخراً إن اللي أنا بعمله ده متسق مع طاقتي الأنثوية كأنثى
إن الأنثى لو هتشتغل المفروض تشتغل في حاجة بتحبها من غير صراعات وتحديات ومنافسات ووجع دماغ، تعمل اللي هي بتحبه وعايزاه بس في هدوء وروقان بال
لكن طاقة التحدي وإجبار النفس ع حاجة مش حباها والدخول في صراعات ومنافسات دي طاقة ذكورية
ولما الواحدة بتعمل ده في مجال شغلها بتعلي عندها الطاقة الذكورية، حتى لو مظهرها من برة أنثوي وجميلة وكل حاجة، لكن طاقتها طول الوقت بتبقى طاقة سيطرة ونفوذ ودي طاقة ذكورية، وبالتالي بتبقى كمعاملة زيها زي الراجل، وده اللي بيفشلها في أي علاقة ارتباط لإنها لو ارتبطت بواحد طاقته الذكورية مظبوطة هيبقوا طول الوقت بيتحدوا بعض مين فيهم اللي تبقى ليه المريسة، وحلها ساعتها إنها ترتبط بواحد عنده طاقة أنثوية عاليه (ده مش معناه حاجة وحشة من الشتايم اللي بتتشتم يعني) لا هو بس بيبقى حد بيحب راحة البال والروقان وانه ميشيلش مسئولية؛ فيسيب لها الليلة والعلاقة هي اللي تديرها، بس المشكلة برضه إن أغلب الستات في الآخر بيزهقوا من الدور ده لإن الأنثى اللي جواها بتفضل تصرخ إنها عايزة تدلع وتقعد مرتاحة كدة وحد يشيل مسئوليتها مش هي اللي تشيل مسئوليته ومسئولية كل حاجة حواليه، فبرضه في النهاية العلاقة بتفشل يعني
المهم أنا مبسوطة إني لاقيت نفسي أنثى في حاجة لإن أنا أصلاً عندي طاقة ذكورة عالية وحب سيطرة وتحدي وبتنجان فالحمد لله لاقينا حاجة مظبوطة عقبال ما نظبط الباقي 😂

#صفحات_من_حياتي
#سارة_الليثي