المجموعة الكاملة لشاعر الشعب Quotes

“في الطريق

أربع عساكر جبابرة يفتحوا برلين

ساحبين بتاعة حلاوة جاية من شربين

شايله على كتفها عيل عنيه وارمين

و الصاج على مخها يرقص شمال و يمين

إيه الحكايةيا بيه ؟ جال خالفت الجوانين ؟

إشمعنى مليون حرامى فى البلد سارحين

يمزعوا فى الجيوب و يفتحوا الدكاكين ؟

أسأل وزير الشئون و لا أكلم مين”
― بيرم التونسي, المجموعة الكاملة لشاعر الشعب: بيرم التونسي

“جــدع معـلـم قــــــــــال لخـالـتـك ام هــــــــلال
شوفي لنـا بنـت حـــلال تكـون لطيفـة و عــــــال

بنـات كتيـر حلــــــــويـن عنـد اهلهـم قاعـديـن
ما بين طبيـخ و عجــــيـن و بخـتـهـم بـطــــــــــال
...
عايزهـا لحـم فصـــــــوص مش عود قصب ممصوص
و محربقـه بعصعــــــوص و عامله روحهـا غـزال

عايـز قــــــــــــــوام يتـهـز إن دزيـتـــــــيـه يـنــدز
و ف كـــــــل مفصـل حـز يـفـكـرك بــهـــــــــلال

عايـز نتايـه صحـــــــيـح من ربـع شمـع تسيـح
مهـوش بشكــــل قبـيـح لـكـن بــذوق و دلال

عنـدك بنـات جمــــــالات مقلوظــــيـن نـتـايـات
و دمـهـم شـربـــــــــــات يسكـر نسـا و رجــال

تحققـي فـــــــي الـزيـن البنـت ترخـي العـيـن

دي مهـــــــرهـا ألـفـيـن أحطهـم فــي الـحـال

أما اللي عامــلـة سبـور و جــــــــدهــا بـلـفـور

و عايـزه واد دكــــــتـور خسـارة فيهـا ريــــــال

و لا اللـي عامـلـة إياه و شعـــرهـا قـصــــــاه

و بأكســــجيـن صابـغـاه دي تجـــلـب الإسـهـال

و ان جبتي واحده بكرش من الحمير مـا تغيـرش

مانيش واخدهـا بقــرش و احـط فوقـــهـا شـوال”
― بيرم التونسي, المجموعة الكاملة لشاعر الشعب: بيرم التونسي

“يارب سلطان جمالك يتعبد للــذات
خالص لوجـهك لا للـنيران ولا الجنات

لكن عبيـدك و خلـقك يعبدوك لغايات
صبحوا ونا عبد منهم كلهم ترسات

التاجر اما افتقر صلى و صام الفرض
و العمدة لما اترفت جالك وقع فى العرض

و القطن لما اتحرق صاحبه سجد عالأرض
و كلـهم عالعبـــادة يطلبـــوا حسنـــات”
― بيرم التونسي, المجموعة الكاملة لشاعر الشعب: بيرم التونسي

“احب بنت البلد والحب بهدلني
ومن بروج الأدب والفن نزّلني
احب عوجه لئيمه اشتكي للّه
من غلبي منها وتشكي غلبها مني
جاهله اذا تفرّجت في جنينة الحيوان
تقول على النمر قطه والوعول خرفان
وتقول على البنك سيما والبلوز فستان
لكن يصيبني البكم لما تجادلني
جبانه تصرخ من النمله بعزم الصوت
والبورص طلّع عليها عزرائيل الموت
لكن يفوت رمش عينها من فؤادي فوت
ان كنت ميت قتيل هوهّ اللي قاتلني
راكبه على الكارو تتسامر مع الحمار
والشمس فوق جسمها تشعل وتقدح نار
ولما يوم ينتظرها ابن الذوات ببكار
تقول له روّح على امك وابقى قابلني
احب بنت البلد من فرط خفتها
هوليود على بدعها ما تجيبش عصبتها
ولا بنات لندره تتلف لفتها
أدي اللي جاب لي البلا أدي اللي هابلني”
― بيرم التونسي, المجموعة الكاملة لشاعر الشعب: بيرم التونسي

“يا مصري و انت اللي هاممني من دون الكل
هزيل و يحسبك الجاهل عيان بالسل
من دي الكيوف اللي تصبر على كتر الذل
و نمت و العالم فايق قوم بص و طل
و شوف الشعوب و اتغص و دوب و ارجع إنسان”
― بيرم التونسي, المجموعة الكاملة لشاعر الشعب: بيرم التونسي

“ليه امشى حافى ،وانا منبت مراكيبكم
ليه فرشى عريان،وانا منجّد مراتبكم
ليه بيتى خربان ،وانا نجّار دواليبكم
هى كده قسمتى؟
الله يحاسبكم!

ساكنين علالى العتب،وانا اللى بانيها
فارشين مفارش قصب،ناسج حواشيها
قانيين سواقى دهب،ونا اللى ادور فيها
يارب ماهوش حسد
لكن بعاتبكم

من الصباح للمسا،والمطرقه فيدى
صابر على دى الاسا ! حتى نهار عيدى
ابن السبيل انكسى ، واسحب هرابيدى
تتعروا من مشيتى
واخجل اخاطبكم

ليه تهدمونى وناللى عزكم بانى
انا اللى فوق جسمكم قطنى وكتانى
عيلتى فى يوم دفنتى مالقيتش اكفانى
حتى الأسيّه وانا راحل وسايبكم؟”
― بيرم التونسي, المجموعة الكاملة لشاعر الشعب: بيرم التونسي

“الحب كده وصال ودلال ورضا وخصام

اهو من ده وده الحب كده مش عايز كلام

الحب كده

حبيبي لما يوعدني تبات الدنيا ضحكالي

ولما وصله يسعدني بافكر في اللي يجرالي

ينسيني الوجود كله ولا يخطر على بالي

ولما طبعه يتغير وقلبي يبقى متحير

مع الافكار ابات في نار وفي حيرة تبكيني

وبعد الليل يجينا النور وبعد الغيم ربيع وزهور

اهو من ده وده الحب كده مش عايزه كلام

الحب كده

حبيب قلبي يا قلبي عليه ولو حتى يخاصمني

ويعجبني خضوعي اليه واسامحه وهو ظالمني

وبعد الغيم ما يتبدد وبعد الشوق ما يتجدد

غلاوته فوق غلاوته تزيد ووصله يبقى عندي عيد

وبعد الليل يجينا النور وبعد الغيم ربيع وزهور

اهو من ده وده الحب كده مش عايزه كلام

الحب كده

يا سعد اللي غرف مرة حنان الحب وقساوته

ويا قلبه اللي طول عمره ما داق الحب وحلاوته

تشوفه يضحك وفي قلبه الأنين والنوح

عايش بلا روح وحيد والحب هو الروح

حبيب قلبي وقلبي معاه بحبه في رضاه وجفاه

اوريه الملام بالعين وقلبي على الرضا ناوي

بيجرح قد ما يجرح ويعطف تاني ويداوي

اهو من ده وده الحب كده مش عايزة كلام

الحب كده”
― بيرم التونسي, المجموعة الكاملة لشاعر الشعب: بيرم التونسي

“راحت على الشمس نومة و البلد فى ظلام”
― بيرم التونسي, المجموعة الكاملة لشاعر الشعب: بيرم التونسي

“أما صحيح ان اللى بيختشوا ماتوا .. و كل أهل التلامه و البرود عايشين”
― بيرم التونسي, المجموعة الكاملة لشاعر الشعب: بيرم التونسي

“و فى السما رب للطاغين يوريهم
لما ياخدهم على بغته و أخده أليم
إذا حكم ربنا عاللى طغا بالحد
يعمى بصيرته و يجعل له المسالك سد
و يضحك الناس عليه يوم الوقار و الجد”
― بيرم التونسي, المجموعة الكاملة لشاعر الشعب: بيرم التونسي

“قريت و مليت كفايه
خوف السقوط و البطاله
و كل ما ازداد قرايه
بالدنيا أزداد جهاله
يا طالب العلم تنداس
لو يبقى علمك بضاعه
تنفع و تستنفع الناس
لو كنت صاحب صناعه

يا عالم العلم بالله
يزيد في نور البصيره
و اللي استنارت نواياه
يلقى الذهب في الحصيره

إن كنت تطلب رضى الله
يجعل لك الناس عبيدك
و ان كنت تطلب رضا الناس
أقلهم يبقى سيدك

الحلم و الصبر كنزين
روتشيلد محتاج إليهم
و اللي يقولوا الكنوز فين
ابكي يا عيني عليهم”
― بيرم التونسي, الأعمال الكاملة - بيرم التونسي

“م المستحيل إنت تخدع أي طفل صغير
و تلف عقله و تعطيه القليل بكتير
لكن بأهون طريقه تخدع الجماهير
لو كنت أغبى غبي تجري وراك و تسير
* * *
خليل يصقَّف, يصقف شعب ويا خليل
من غير ما يسأل عن الأسباب والتفاصيل
* * *
و حمار يغني, وجايب من يقول له: آه
حالاً تقول الخلايق كلها ويّاه
* * *
الحق يخفى وفي وسط الزحام ينداس
وناس في فهم الحقيقه, تتكل على ناس
ويساعدك الحظ ياللي تحسن التجعير”
― بيرم التونسي, المجموعة الكاملة لشاعر الشعب: بيرم التونسي

“لا يتمحى من أرضنا
و لا يزول و احنا هنا
متمسكين بحقنا
متسلحين بعزمنا
أعدانا شافوا البينه
اللى بنوه فى سنين فى ساعه انهدم”
― بيرم التونسي, المجموعة الكاملة لشاعر الشعب: بيرم التونسي

“و لا سياسي و دبلوماسى
على الكراسى يحكم عليه”
― بيرم التونسي, المجموعة الكاملة لشاعر الشعب: بيرم التونسي

“الأوله أمه خايبه و التاريخ معلوم
و التانيه جات ضربه صايبه من بلاد الروم
و التالته قول جاتنا نايبه و الكلام مفهوم
الأوله آه .. و التانيه آه .. و التالته آه”
― بيرم التونسي, المجموعة الكاملة لشاعر الشعب: بيرم التونسي